半夜醒來，那雙含情脈脈、動人的雙眼，開朗的笑聲和甜蜜的微笑在腦海中不斷浮現
不禁睜開眼睛，看看周圍
妳不在我的身邊
相隔萬里
只能用電話，電郵進行聯繫
左邊的肩膀莫名其妙地感覺到不自然的感覺
原來它也思念被妳安然地睡在上面的感覺
然而，左腳也不懂得如何去擺放
只因為左邊缺少了與它爭位置的妳
左手手心空著停留在半空中
不能擁抱著妳的它，不知所措
體內每一個細胞都在呼喊著
缺少了妳的體溫
缺少了妳的心跳
它們不知如何是好
是的
在這半夜的時候，我想念妳了

好多好多年前，係一個街市入邊有一粒牛肉丸同埋一粒豬肉丸。
佢地一齊玩耍，一齊分享每日係街市當中發生嘅事。
慢慢地，粒牛肉丸個心開始俾豬肉丸佔據，每日最想做嘅事就係可以留係豬肉丸身邊同佢傾計。
牛肉丸好中意望住豬肉丸對眼。佢覺得豬肉丸對眼好靓，尤其係當佢講D好爛嘅爛gag氹到豬肉丸笑到見牙唔見眼嘅時候，牛肉丸心入邊就出現一種好奇怪嘅感覺。
牛肉丸知道佢中意左豬肉丸了。但係，牛肉丸卻沒有把這事告訴其他人。
因為，佢知道，呢份感覺只屬於佢同豬肉丸。而佢唯一願意分享嘅人，只有豬肉丸。
況且，當時有蝦丸嘅存在。

某一晚，佢地街市嘅一班朋友一同去牛扒間屋企party。
當晚，係牛肉丸準備行番去佢個盒度訓覺嘅時候，經過見到訓得好熟嘅豬肉丸。
一縷月光照在豬肉丸面上，牛肉丸呆左。牛肉丸一直企係原地，呆呆甘望住豬肉丸，佢好清楚知道，能夠可以甘樣望住豬肉丸嘅機會唔會太多。
終於，牛肉丸要同豬肉丸分開了。因為街市店鋪要調整嘅原因，豬肉丸要去到荒村間豬肉加工廠度。
而牛肉丸就去左原先間街市附近個面檔。
牛肉丸個心唔知點算。佢唔想就甘同豬肉丸分開，佢好想將佢內心嘅感覺話俾豬肉丸聽。
呢班街市朋友人人都買左本簿仔，等其他人可以留底D聯絡方式同埋說話。
牛肉丸係豬肉丸個本上邊寫左句：“無論發生乜野事，係你身邊一定會有人永遠支持你，永遠撐你⋯⋯”（當中，隱藏左一句“只要豬肉丸有事，牛肉丸就會盡快趕到豬肉丸身邊。”）
當然，佢唔知道豬肉丸會唔會知道呢句話當中嘅意思。
但係，同時牛肉丸又唔敢直接講出來。

後來牛肉丸懷著惶恐嘅心去約豬肉丸出街。
但係，天意弄丸，佢地一直都無機會單獨去街。
牛肉丸忍唔住了，佢話俾豬肉丸聽佢心入邊嘅感覺。點知，豬肉丸話：“嚇？我一直當你係我阿哥甘噶咂~~~~”
就係個一刻，牛肉丸頓時語塞，唔知可以講乜野好⋯⋯（慘念~~~ -_-|||  第一張好人卡就甘就送左去牛肉丸手中~~~~）
為左打破呢個甘尷尬嘅時刻，牛肉丸又開始扯其他嘅話題。

過左無耐，呢班街市嘅朋友仔又一齊出來玩了。
但係牛肉丸等極都等唔到豬肉丸嘅出現，佢心中不禁想到豬肉丸開始避佢了。

時間過得好快，佢地分開左差唔多一年了。
係牛肉丸個間面檔，入邊嘅閒言閒語多到數之不盡。
就連一向同緋聞呢兩個字點扯都扯唔埋嘅牛肉丸都成為左當中嘅主角。
但係牛肉丸好清楚，佢心目中只有豬肉丸一個。
一年時間過去，又來到左豬肉丸牛一嘅時候。
但係就當牛肉丸好開心甘等待豬肉丸出現嘅時候，出現係佢視線範圍嘅居然唔止一粒豬肉丸。
牛肉丸個心即刻down曬。
但係佢同自己講，愛一個人，無非都係想佢開心同埋幸福嗟。
於是，佢扮到若無其事，從心底祝福佢地兩個。

光陰飛逝，眨眼間，通信方式都從人手一部嘅baby雞進化成為瘦雞。
而粒牛肉丸都差唔多做左18年嘅牛肉丸了。
就係粒牛肉丸為左前路奮鬥，對眼由當初嘅100度升到去300度，係塗輸管溫習嘅時候。
瘦雞嘅鳴叫將佢係勿理旋渦當中拉左出來。
原來係豬肉丸搵佢。
佢地傾左好多野，同以前一樣，天南地北乜都傾。
最後，牛肉丸sent左一句：“其實，你知道無論去到邊度，無論幾時都好，只要你有事，一定會有個人出現係你身邊去幫助你，去安慰你，保護你⋯⋯”

時隔4年，身邊嘅朋友不斷地變化。
發生係牛肉丸同豬肉丸身上嘅事都越來越多。
有一日，牛肉丸將佢有機會出口嘅事第一個話左俾豬肉丸聽。
個一刻，佢地嘅生活開始改變了。
面對住一個自己等待左6年時間嘅肉丸，牛肉丸唔知可以作出乜野嘅抉擇。
出口嘅機會固然難得，但係換句話講就係要同豬肉丸分開。
然而，如果留係度做local，佢唔知自己可以做D乜野帶俾豬肉丸有生活嘅保障。
正正係呢種對前路嘅迷茫，內心嘅掙扎，牛肉丸一直唔敢行前一步。
命運總是喜歡作弄人的，就當牛肉丸決定踏出第一步嘅時候，牛肉丸聽到一個佢呢世都唔想聽到嘅消息。
牛肉丸開始灌醉自己，希望自己醉左之後可以乜都忘記。
更搞笑嘅係，係牛肉丸明知道自己飲完酒之後會失聲嘅情況下，佢唱左一首佢一直都好想唱俾豬肉丸聽嘅歌⋯⋯（甘當然係走曬音啦⋯⋯）

之後牛肉丸決定要忘記，忘記甘多年來一直收埋係佢心中嘅點點滴滴。

但係⋯⋯忘記係一件很艱難嘅事。尤其係對牛肉丸來講，要佢忘記豬肉丸，簡直要俾佢去忘記sin2+cos2=1更加難。
就係牛肉丸成為出口牛肉丸一年之後，回歸出產地嘅時候，牛肉丸同豬肉丸再次見面了。
牛肉丸個心情好複雜，其實，佢唔知點樣去面對豬肉丸，佢唔知對住豬肉丸嘅時候可以講D乜野。
就係呢個時間入邊，牛肉丸佢聽到一個更加令佢目瞪口呆嘅消息。
牛肉丸好心痛，好唔理解。佢好憤怒。
牛肉丸個心好似突然俾人抽空左一樣，成為一粒真空牛丸。
牛肉丸唔知道點解係呢一年時間入邊會有甘多野發生。
牛肉丸內心好掙扎，佢好後悔，後悔自己要出口。
佢係度懷疑，若果呢一年時間自己留係出產地嘅話，事情嘅發展會唔會唔同。

牛肉丸再次翻番去入口國。
佢再都無聯絡過豬肉丸，因為佢宜家更加唔知點面對豬肉丸。
佢唯一可以做嘅，就係將豬肉丸擺係佢每日禱告當中。
佢不斷甘祈求神能夠賜智慧同力量俾豬肉丸。
牛肉丸有嘗試過放低，但係佢自己嘅感覺呃唔到佢自己，佢仍然很愛很愛豬肉丸。

當牛肉丸再次回歸生產地嘅時候，佢考慮左好耐究竟話唔話俾豬肉丸聽佢番左來。
終於，佢打左一個電話。
事隔兩年之後，係牛肉丸眼中嘅豬肉丸仍然係佢認識嘅豬肉丸。
從豬肉丸口中聽到佢係呢兩年嘅變化，呢兩年嘅生活嘅時候，牛肉丸感到好欣慰。
雖然已經過左甘多年，但係係牛肉丸心中，豬肉丸嘅地位仍然係甘重要。
只要豬肉丸開心，佢就開心；豬肉丸唔開心嘅時候，佢就更加唔開心，以及想盡一切辦法佢氹番豬肉丸開心。

10年後嘅一日，牛肉丸同豬肉丸終於行前左一步。
係個一刻，牛肉丸個心情簡直難以用言語來形容。
佢知道，佢終於等到一個值得佢去等嘅人。
同時，牛肉丸都知道佢會好好珍惜呢粒豬肉丸。
快樂嘅時間總是過得特別快，相處只有短短20日嘅兩粒肉丸到左又要分開嘅時候。
係去緊飛雞場嘅道路上，兩粒肉丸粒聲唔出。
前後座嘅方式令到佢地彼此睇唔到對方嘅表情。
有幾次，牛肉丸或扭過頭，或從倒後鏡中望住佢深愛嘅豬肉丸。只見豬肉丸一直望住車窗外，略有所思。
牛肉丸個心情好沈重，佢當然想一直留係豬肉丸身邊陪住佢。但係為左兩粒肉丸將來嘅生活，佢又不得不踏上飛雞。
係過關嘅過程中，牛肉丸不停甘用右手打自己個心。因為佢知道，如果佢唔甘做，佢嘅眼淚好可能會忍唔住留出來。
牛肉丸終於忍唔住望番轉頭，佢見到豬肉丸同牛肉丸爸行緊出機場。佢望左好耐好耐，直到視線範圍之內再也見唔到豬肉丸為止。
牛肉丸心中頓時產生左一個念頭：行番出雞場，留係豬肉丸身邊。

係隻飛雞上邊，牛肉丸訓訓下醒左，然後好習慣甘去睇下身邊嘅豬肉丸有無fu被。點知⋯⋯隔離係一塊老豆腐。。。。
呢隻飛雞可能會比平時飛得低，因為粒牛肉丸個心變得好重。
牛肉丸不停甘睇自己隻表，佢係度想緊豬肉丸訓覺嘅時候有無再fu被，有無再冷親。
從隻飛雞上邊落來之後，牛肉丸第一時間拿起個電話，打俾豬肉丸。
因為其中有隻雞cancel左，佢驚豬肉丸擔心。

------------------------------------------------------------------------------------
近日，牛肉丸同豬肉丸出現問題。
粒牛肉丸果然無改錯名，好似隻牛甘鈍。因為佢嘅疏忽，佢嘅唔細心，令到粒豬肉丸好傷心。
牛肉丸好想豬肉丸知道，
無論發生乜事，牛肉丸都會陪伴係豬肉丸身邊；
無論幾時都好，牛肉丸永遠都會係屬於豬肉丸嘅牛肉丸。
------------------------------------------------------------------------------------
we have spent ten years to start a relationship.
i'll do everything to protect it.
i am still yours, ever and for ever.